Жыл сайынғы өтетін экспресс-тест сайысына бөлімнің атынан взвод жеке құрамы қатысады. Сайысқа қатысқан әрбір взводтың көрсеткішіне қарап сол әскери бөлімнің жауынгерлік даярлығына баға беріледі. Ол, барлық жағынан дайындығы жақсы, ең мықты жауынгерлік бөлімді анықтау ғана емес, сондай-ақ жауынгерлерді ширатып, ұрыс кезінде болатын әртүрлі жағдайларға бейімделуіне, тәжірибе жинақтауға ықпал етуге бағытталған.

Аталмыш сайыста Шымкент гарнизонының механикаландырылған бригадасының мотоатқыштар, танк және мергендер взводтары сынға түседі. Олар атыс және дене шынықтыру даярлығы, БМП-2 және Т-72, АК-74, СВД қару-жарағынан жеке және взвод құрамында ұзақ қашықтыққа ату, қол гранаталарын лақтыру, АТА (атлетизм – табандылық – алғырлық) кедергілер жолағынан өту, взвод құрамында жауынгерлік машинаны жүргізу, белтемірге тартылу, 24 келілік кір тасын жұлқып көтеру, бес шақырымға жүгіру сынды жаттығулар бойынша дайындалып, шеберліктерін шыңдауда.

- Қазіргі таңда әскери бөлімнің абыройын арттыру үшін барлық жаттығуларды жоғарғы деңгейде орындап, тәжірибені шыңдау мақсатында жақсы дайындық үстіндеміз. Жігіттердің дайындығы мықты, барлығының жеңіске деген ұмтылыстары көрініп тұр. Сайыста жүлделі орын алуымызға сенімдіміз, - дейді танк взводының командирі аға лейтенант Қазбек Әбенов.

Айта кетсек, осындай әскери сайыстар мен жауынгерлік жаттығулар әскеріміздің қуатын айқындайды.

Шымкент гарнизонының баспасөз қызметі